في بالي الناس وسخ الدنيا

عشت حياتي الكلها منزوس وناي في بالي

ما يلزمنيش نمس النزاسا

وخشمي ديما مهزوز 

ننقد في كل واحد علِّي عِنْدَهْ من وسخ في كاسَهْ

ونقول ونعاود:

ما يلزمنيش نحكي مع اللي النهار وطوله يشكي 

باش ما يتعبنيش وبدموعه نولّي نبكي

وباش ما نوَلّيش بْلُوغتَه نخمّم ونحكي

وسكّرت بيبان روحي وشبابكها

على ما ياتي

على الناس ولّي جايني منهم

من التعب والميزيريا والقلب الأسود

خايف على طرف الضو إلي فيّ

لا يَطفا ويولّي ظلام ِم الظلام إلي فيهم

ابعدوني وأخطوني ما تمسّونيش

بالنزاسة إلي فيكم!

كلامكم سيوفا تذبح

وخزرتكم تنكّد ع الي يحب يعيش ويفرح

وتعِبت وناي هارب م الناس

متخبّي ف مْغارة الوحدة والنواح

وفي لحظة ساكتة وم السكات تعبتني

ركعت وبكيت وصليت وقتله

إنت المسيح، نجيني

إنت الطريق، الثنية وريني

إنت الحياة، م العيشة الي عايشها خرّجني ومن جديد احييني

ياخي في لحظة حنَانِةْ قلبه مسّت قلبي

وفي لحظة قلّي في مغارة الوحدة ناي نحب نجي نواسيك

ونرافقك، هاذا وعدي، بروحي القدس الساكن فيك

ناي ما تبدّلتش م النهار الي قابلتني فيه

ومانيش باش نتبدل، لا بعد ثورة، ولا كيف تتبدل الناس

ولا كيف العالم

الشر يكثر فيه

ناي عالم بكل شيء وما يزعزعنيش حتى شيء

لكن ناي الي نلمس قلوب الناس ونبدّلها

وقلوب الناس المسْخَة ناي الطاهر القدوس

نْحِنْ عليها ونحرّرها

ناي جيت للمَسَّخْ والضّايع والمسكين

والظالم نرده للثنية للطريق المستقيم

وبمحبة عظيمة نْلِمْ أولادي

بترنيمة لمجد اسمي: عمانوئيل الفادي العظيم

وكِيفْ تقابل الناس من جديد ناي نكون بجنبك

كيف ما تعوّدت علِيّ في مغارة وحدتك

نْونْسِك ونْقَوِّيك وبين ذراعاتي نحميك

انت خايف م الوسخ لا ينجسك

أعطيني كل حد محتاج لكن متَعْبِك

وناي بدمي الطاهر ننقّيه

ناي المسيح جيت لكل ميت

جيت باش نحييه

(المرجع)