تحّرك وتبّعني

من صُغْرِي سْتَانِسْتْ بْرُوحِي قَاعِد

قاعِد عَ الدّنيا نجري

قاعِد نِتْسَهْوِكْ ونِتْلوعِبْ ونَلْعِبْ

ولغة الله غالب ... وهاني ...وهاني قاعد...

سْتَانِسْتْ حتّى لِينْ رْكَايْبِي بِرْكِتْ

حتّى لِينْ مفَاصْلي سَوْسِتْ ونَايَ قاعِد

وقهوة وْرَا قهوة

وأصحاب وَلَمَّة

والدنيا تِتْعَدَّى

وْنَايَ كَأِنِّي في حِلْمَة ... في سَهْوَة

قاعد

من صغري تعلمت نْتَبَّعْ رَايْ الأغلبية

وما نْقُولِشْ لا

وما نْخَمِّمْشْ فِلِّي يَعَلْمٌوهْ لِيَّ إِلِّي دايرين بِيَّ

وكبرت وكبرنا

والبركة والغَشَّة والتْكَركِير والوْسَخْ مَاكِلْنَا

قالولي كول على كِيِفكْ وإلبس على كِيفْ الناس

ياخي كبرت

ناكل إِلِّي ياكلوه

ونلبس إلي يلبسوه

حتى لين بالشوَيَّة بالشوَيَّة قلبي تِزْرع فيه

الصوَاب إلي هوما يشوفوه

وقراراتي وحياتي

وتفكيري هوما إلي يْسَيْرُوهْ

لكن جَاِني في نهار من النهَارَات ونَايَ كِيمَا غيري قاعد

جاني إلي قَلِّي قُومْ فِزْ تْحَرِّكْ

وأنْفُضْ دُودْ الموت إلِّي إنتَ فيه

وإلي قاعد ياكل فيك وتَبَّعْنِي

لكن الخوف تْمَكِّنْ مِنِّي

كِيفَاشْ بعد سنين ونَايَ بَارِكْ في بْلاَصْطِي

في لحظة نوقِف على سَاقَيَّ

في لحظة نِمْشِي في الثْنِيَّة

في لحظة نَنْسَى إلِّي تْعَدَّى عْلِيَّ

في لحظة نْسَلْمَهْ إلِّي فَاتْ والحاضر وإلي جاي عْلِيَّ

في لحظة نْخَلِّي إلي سْتَانِسْتْ بِيهْ من نَاسِي وأُمَالِيَّ

لكِنَّهْ قَلِّي: اسمي هو الوعد إلي نَعْطِيهُولِكْ

اسمي عمانوئيل: الله معاك

نَايَ الرب إلي يعطيك الخَطْوَة ويمشي معاك

وكيف تِتْعِب في الثنية يِسْتَنَّاكْ

وكيف تْطِيحْ يْمِدْ يديه ويْهزِّكْ ويْدَاوِي جُرْحِكْ ويَرْعَاْكْ

أَسْمَعْ كلامي وما تَبْقَاشْ كِي غِيرِكْ

زَمِّرْنَالْهُمْ وهُمَّا قَاعْدِينْ

نَوَّحْنَالْهُمْ وهُمَّا لاَ عْلَى بالْهُمْ جَامْدِين

في بالْهم في الدنيا عايشين

لكنهم في الحقيقة مِيْتِين

كيف الغْلَم كل يوم يسيروا كِيفْ لُخْرِينْ

في بالي مادام نْتَبَّعْ فِلِّي يعملوا فيه مانيش باش نضيع

لكن في الحقيقة

ماعادش نعرف الصحيح مِ الغْلَطْ فِلِّي نعمل فيه

التلفزة تْعَلِّمْنِي شَيْ

والمسلسلات والحكايات والفِيلْمُوَاتْ وفْلاَنَة لِبْسِتْ في الكْلِيبَاتْ

وفي الشارع العَرْك والشْبُوكْ

وخَلِّي عَادْ الحْوَايِجْ المَنْشُورَة على الفايسبوك

هذا الكُلْ قَلِّي أُتْرُكْ قُومْ وتْحَرِّكْ

وأنْفُضْ مِنْ عْليك الغبرة

وتبع خطوة المسيح تْجَدِّدْ

ولاّ قاعد بِين العالم إلي عايش البَرَّة والمسيح مِتْرَدِّدْ

قوم وتبع وعده ليك

وخلي إلِّي ستانست بيه وستانس بيك

وإمش في ثنية جديدة

وهذا وعدي ليك 

نَايَ نْقَوِّيكْ وْنِحْمِيكْ