إبليس الكذّاب

جاني في نهار م النهارات حد نعرفو يشكيلي من صاحبي عندي مدّة ما شفتهوش وقلّي: "ريت فلان طلع موش ثيقة. وعمل بعمايلو. طلع مشوم وقلب الفيستة وما يتعمّلش عليه. راهو دوني رد بالك منّو راهي الضربة إلّي تجي في الظهر توجع أكثر مل الكف"

قتلو: "غريبة! راني نعرفو بالڨدا وعشرة عمر موش نهار موش ثنين. صحيح عندي مدّة ما شفتهوش. لكن بلّي كلامك غريب برشة وصعيب نصدقو"

دخّلني كلامو بعضي. وبقيت نتذكّر في صاحبي والأيامات إلّي عدّناها مع بعضنا. وكيفاش كان صاحبي واقف معاي ديما في الشدة. غريبة؟ ياخي تبدّل لاها الدّرجة!!! وقلت والله ما نكسّر الشك متاعي ونمشي نحكي معاه. وهكاكا مشيتلو وعملنا قعدة طويلة مع بعضنا. ولقيتو هو هو ما تبدّلش. وتذكّرنا أياماتنا إلّي تعدّات محلاها. وتواعدنا من نهارتها ديما نتقابلو. وقلت في قلبي "ما نسلّم في صاحبي على كلمة، والصاحب صاحب بالكلمة. وما تشكر إلا ما تعاشر وبعد العشرة تبان الناس الملاح".

عرفتو شكونو إلّي جاني يذم ويشكي؟ هاذيكا صنعتو ديما إبليس الكذّاب جاني يشوّه في صورة الله في قلبي. لكن كيف رجعت لربي وحكيت معاه ومن كلامو في الكتاب المقدس تذكّرتو ربّي محلاه، رجعت للثنية الصحيحة. راهو ما تعرف صاحبك من عدوّك كان 

بالعشرة وطول العشرة تعرفك الذهب من القشرة 

في الوقت الصعب